有家長疑為「玩吓順便打卡」，竟讓年幼子女坐上自己大髀，一同緊握軚盤「學駕車」，相關片段近日在網上瘋傳，再次掀起安全及教養爭議。片中可見，小童坐在司機腿上，雙手握住軚盤，身旁大人不但沒有阻止，反而開心拍片，上載社交平台炫耀「仔仔第一次揸車」，惹來大批網民狠批行為罔顧安全，「唔汲取教訓，好幼稚」。
片段顯示，涉事車輛當時正行駛中，司機座位上除了成年人外，還擠着一名身形細小的小朋友，兩人一前一後貼住坐。畫面所見，小童雙手放在軚盤上來回扭動，司機則間中以手輕扶軚盤及波棍，有笑聲伴隨旁白稱「細路學揸車」，似乎對情況毫不在意，亦未見有佩戴安全帶。期間車外景物持續移動，顯示車輛並非停泊狀態。
片段上載網上後，隨即引發熱議，大部分網民對相關行徑怒不可遏，批評做法極不負責任。「條命都係命，細路又唔識分分鐘出事」、「一撞唔單止害自己個仔，仲害人」、「玩都要識玩，揸車唔係玩具」等留言洗版。有留言直斥司機「唔汲取教訓，好幼稚」，指近年已多次見到同類「俾小朋友揸車」影片，仍然有人覺得「好cute好威」，根本無當道路安全一回事。
亦有網民指出，若發生緊急情況，例如前車急煞或突然有行人橫過，坐在大人腿上的小童很容易撞向軚盤或擋風玻璃，後座乘客亦可能因沒有正確使用安全帶而被拋前，後果不堪設想。「細路個骨仲好脆弱，氣袋彈出嚟都可以整傷佢」，有家長直言單是想像畫面已覺得後怕，呼籲父母切勿為一時好玩，將子女置於危險之中。
記者：Ceci
閱讀更多：