福飯飽肚，更飽滿愛。
疫情拖累本港經濟，過往以推動長者就業為宗旨的社企「銀杏館」，旗下六間分店生意大減，去年開始全線「變陣」，為弱勢人士派發福飯，以確保員工工作量。福飯派發已一年有多，每日製作福飯多達一千二百個，負責人明言艱難日子未過，但能見證部分飯友終覓新工，認為堅持有價。
「銀杏館」福飯派發始於三年多前，原因是油麻地區內長者、綜援人士較多，分店「越老」便製作福飯﹐提供予獨居長者、無居者，銀杏館CEO麥敏媚表示，當時每日都製作飯盒量只是數十個。
「點知去到疫情時，睇到個需要越嚟越大，有班朋友真係失業咗成半年，先至上嚟（領飯）。」麥敏媚表示，起初派飯也只是回饋街坊，及至去年二月，疫情導致不少弱勢人士三餐不繼，「餐廳生意其實跌左七、八成，我諗成個餐飲業都係，但你睇到（領）福飯人數就上升。」店內生意頓減，連帶廚房、樓面的長者員工工作量都減少，但銀杏館不是一段店舖，生意少就減人手，為了貫徹長者就業宗旨，麥敏媚毅然擴展派飯規模，讓長者員工照樣有工可開。
義工Suzan由疫情初期開始幫手，見證領飯人數不斷增加，令她驚訝的是，飯友年齡層面原來相當廣泛，見過20多歲青年前來領飯，「裝束係好便服呀，要返工呀，乜類型嘅人都有。有人仲推住BB車。老人家（拎飯）我哋以為好正常，但有人喺由屯門山長水遠出嚟拎。原來香港係好（多人）有需要，嚟拎一個飯」。
43歲的導遊阿鐵，專責接待外地遊客。他是分店「越老」其中一名長期飯友，至今放無薪假已有一年，「公司通知嘅只係放無薪假，唔係炒我呀，因為炒人要畀遣散費！」，但至目前為，他仍看不到行業何時好轉，暫時亦只能靠兼職「吊鹽水」。他每日都會到「越老」拿午餐，間中亦會當義工幫忙，「將飯送去某啲地址，畀啲行動不便，出唔到街嘅老人家。油麻地一帶，（因為）係老人區嘛。」
「而家叫多咗時間，都可以見多啲朋友。」樂觀的阿鐵感謝這段時間以來得到的幫助，「銀杏館嘅幫助好大，起碼每日有一餐溫飽。精神上嘅支持，食物上嘅幫助，都係一個好大嘅幫助！」
「（派福飯）都係回應社會需要，事實上好多人真係失業咗半年先嚟拎第一個福飯，佢哋上到嚟申請唔係容易……」麥敏媚稱：「最後要好有勇氣上嚟攞，（所以）我哋要煮得好好畀佢哋。」，「銀杏館」現時銀接受外界捐助，每捐28至38元一個飯餐，機構便向一名飯友提供一頓熱食或飯餐連湯及生果，「社會嘅支持係好重要，我哋都會（向外界）呼籲，原來而家好多人拎福飯，因為有人認講，我哋先有得煮。」
不過，當問到有沒有計劃拓展派飯渠道或規模，麥敏媚當即散手擰頭，「好坦白，我哋想上嚟攞飯嘅人越少先係最好嘅，越少人嚟攞即係代表個社會回復返正常，又或者更多朋友搵返工做，個盼望係越嚟越少。」
對於疫情持續反覆，經濟未見改善，麥敏媚明言就算已稍稍放寬食肆限制，生意已有改善，部分失業飯友亦找到新工，但今年以來，其實只少了數十人領飯，福飯派發仍要堅持下去。疫市艱難之下，甚麼是「銀杏館」維持派飯的推動力？麥敏媚強調，飯菜的「暖意」不但流通飯友，還有長者員工、派飯義工，甚至認講的善心人，「一份福飯雖然微少，但涉及嘅人好多，匯聚咗一個愛嘅流動喺度！」
