街頭健身不靠器材靠自己
高難度招式 灑汗水慢慢累積

街頭健身不靠器材靠自己
 高難度招式 灑汗水慢慢累積
字體大小
AAA
分享

在香港的健身室越來越多,部分更24小時營業,任何時候想健身,也比以前方便。不過,其實健身也不一定要去健身房,走到公園,甚至在家中,也可做到健身的效果。這種街頭健身開始在世界盛行,更有不同的比賽,26歲的姜庭峰就曾經代表香港出戰過不同的國際賽事。

姜庭峰:配合不同角度姿勢去調節負重

姜庭峰自小沒有特別鍾情某項運動,只是間中打打籃球、踢踢足球,直至2013年準備應付中學文憑試時,開始接觸到健身房,他說:「嗰時喺自修室溫書,咁旁邊就係gym,見啲人幾大隻喎,就同個朋友講,不如一齊試吓啦。」在健身房,主要利用健身器材,以重力去鍛練不用部位的肌肉。一推、一拉,來來回回十二萬轉,一日姜庭峰發現到街頭健身,「有師兄send片畀我睇,我就操完gym之後試吓啲動作,上網搵吓資料,雖然嗰陣YouTube冇咁發達,冇咁多教練,但都有人拍吓片,講吓有咩部位要練,點樣做嘅。」

到底街頭健身是什麼,可以引起姜庭峰的興趣呢?簡單而言,街頭健身是利用公園設施,或者是椅子等隨處可見的簡單器材,配合不同角度、姿勢去調節負重,達至鍛練肌肉的效果。另外,街頭健身亦有與體操相似的動作,例如「俄式挺身」,也有「人體國旗」這種街頭健身獨有的動作,這些是最初吸引到姜庭峰的地方,他說:「街頭健身同去gym有啲似,只係用多咗自身重量去玩,加啲動作,好型咁,試吓試吓就鍾意咗。」

街頭健身利用公園設施,即可做鍛鍊操肌。

街頭健身招式是慢慢累積就感更大

姜庭峰認為,從街頭健身取得的成就感更大,「去gym嘅話,可能個重量由10kg、20kg咁加落去,但係街頭健身有啲招式,唔係即刻就會做到,亦唔係一、兩個禮拜就會有好大分別,係慢慢累積。當你一個動作,由做唔到,慢慢練到做得到,個成就感好大。加上啲動作好型,唔係個個人都做得到,好似有少少與別不同嘅感覺。」

街頭健身配合不同角度、姿勢去調節負重,便可達至鍛練肌肉的效果。

如上文提及,街頭健身可鍛練肌肉,也有一些特別的動作。姜庭峰指,平時有鍛練的初學者,肌肉力量較好的話,會較容易上手,他說:「新手如果有去開gym嘅話會容易啲,始終有一定嘅肌肉力量。但係如果冇做開嘅話,利用身體重量都可以練到肌肉出嚟。」運動底子稍欠的初學者,可以先嘗試低難度版本的掌上握,方法與一般掌上壓大同小異,只是需要找椅子或其他可穩固的物件,減低負重。這亦是街頭健身作鍛練肌肉的要點,利用不用角度去增加或減輕負重,代替健身房可找到的鉛鐵等重物。

街頭健身較去健身房有更大靈活性

去健身房與走到街頭鍛練之間的分別,除了是不同的樂趣之外,也其實鍛練身體不同的地方,姜庭峰續說:「去gym好簡單,你今日舉100kg,可能下個月110、120,不斷加上去,或者加吓舉嘅次數咁,gym有唔同嘅機,做訓練時會易少少。街頭健身都有易嘅動作,好似引體上升咁,同去gym差唔多,但難少少嘅動作,例如『人體國旗』、倒立咁,需要嘅可能唔只係力量,係要有埋協調技考同柔韌度,好多方面。可能你協調能力好,但柔韌度差啲,咁個動作都會唔夠靚。」

街頭健身比起去健身房的最大優勢,就當然是靈活性,姜庭峰說:「去開gym嘅人,可能淨係去到gym先會操。但係街頭健身嘅人,就算係打風落雨,就算係之前因為疫情封gym,我哋喺屋企,或者落街都會做到,只要識得運動唔同嘅設施,亦都唔會加唔到重,因為我哋會用唔同嘅角度去改變。」

做「人體國旗」不只需要力量,還需要協調技考和柔韌度。

疫情改變了大家的生活習慣,或者也令更多人接觸到街頭健身。姜庭峰說,他最喜歡訪問當天去到、位於北角海旁街頭健身場地,「對住個海,環境好,而且設施都比較適合。」但這個臨時施設已在訪問之後拆除,將另覓場地重置。除這個場地之外,姜庭峰最常到維多利亞公園,因為施設較多,「維園有幾個唔同嘅杆,雖然比較多人,但係地方夠大,而且有齊單杆、雙杆、馬騮架等。」

姜庭峰:本港公園較難辦街頭健身比賽

街頭健不只是鍛練肉的運動,還有比賽,姜庭峰就多次在本地賽事取得佳績,亦曾在國際賽事中獲獎。可惜的是,疫情下令姜庭峰與一眾香港街頭健身運動員均沒有比賽機會,「疫情前,香港一年都會有一、兩個比賽,我哋多數都會去外國比賽。」他表示,在香港的比賽多數於室內搭建臨時施設,而外國的比賽則有室內,亦有室外,「外國好多地方嘅公園都比較適合街頭健身,香港嘅公園比較難搞到比賽。」他表示,香港公園的設施對使用者的保護未必足夠,難以練習到較難的動作。

比賽模式方面,姜庭峰指,分為不同的比賽類別,他說:「我以前就主要參加freestyle比賽,好似體操咁飛來飛去,倒立、『人體國旗』咁;另外有比賽係鬥保持一個動作鬥耐,例如係『俄式挺身』,亦有引體上升鬥多等等。」他又指,街頭健身其實與體操有不少相似之處,「體操如果係吊環就難好多,因為會搖,但動作其實大同小異,而評分標準都會有少少唔同。」

姜庭峰以前主要參加街頭健身的freestyle比賽。

街頭健身有不少動作都看似危險,作為健身兼街頭健身教練的姜庭峰亦表示,最常受傷的是手腕和膊頭。他亦同時提醒大家,只要量力而為,最危險不是動作本身,而是偷賴沒有做好熱身,他說:「最易受傷嘅原因,係冇做好熱身,同埋做埋啲你做唔到嘅動作。街頭健身要遁序漸進,等你個身體適應咗先,唔可以由0就即刻跳去100,要一步一步嚟。」

記者:Kaman

閱讀更多:

競技啦啦隊大鬥法 點止係表演 翻騰後接穩 考驗團隊默契

熱血球迷吹雞撐起香港美式足球 暴力衝撞背後考驗戰術及團隊合作