蔡家齊19歲初遇roller成終身職業
不分階層育新血 促滾軸溜冰升呢

11 個 月前
蔡家齊19歲初遇roller成終身職業
 不分階層育新血 促滾軸溜冰升呢
字體大小
AAA
分享

因工作需要,蔡家齊19歲接觸滾軸溜冰,自由的感覺令他一試愛上。轉眼間去到22年後的今日,41歲的他是香港自由式輪滑集訓隊總教練,又開辦學校,除了為港隊培訓新血,還希望市民能以滾軸溜冰鞋代步,更想大眾搞清楚一件事:「滾軸溜冰係冇冰㗎!」

蔡家齊繼續溜下去的原因是因自由的感覺

那年19歲,蔡家齊剛畢業,首份工作是到一個度假營打工,「入面有好多唔同運動嘢,射箭、攀石、獨木舟等,我就乜都唔識嘅。」蔡家齊的其中一項工作,是帶領營友體驗不同運動,「最難搞就係滾軸溜冰,因為冇辦法用演技搭救,即係唔識游水可以唔跳落水,唔識射箭都可以淨係拉弓唔放箭。但滾軸溜冰,一著咗對鞋,你一唔識就會成個機械人咁,超級無敵勁弱智。」

蔡家齊19歲時因工作關係初次接觸到滾軸溜冰。

為應付工作,蔡家齊唯有多加訓練,下班後當所有營友離去,他就留在營內盡情練習,「玩落又幾好玩,之後就放咗好多時間落去。」與度假營的合約完結後,他轉到一間非政府組織工作,同時開始擔任兼職滾軸溜冰教練,且與朋友組織了一個滾軸溜冰會。多年後,他更索性轉為全職教練。

開始滾軸溜冰是工作需要,繼續溜下去的原因,是自由的感覺,蔡家齊說:「好多人想買車,買唔到嘅,咪買部單車囉,但係宜家買部單車都可以好貴。roller鞋呢?貴極都唔會好誇張,著對roller鞋可能係最廉價嘅自由。」作為教練,蔡家齊通常給予學員的首個目標,就是能夠以滾軸溜冰鞋代步,「可能有人唔想踩單車同跑步喇,咁有咩啱佢哋玩同代步呢?roller係好方便嘅。」

蔡家齊:roller可以用來代步 但不能行上單車徑

說到代步,就要問問蔡家齊,滾軸溜冰鞋在那個地方才適合使用呢?香港城市規劃有很多不足之處,就算單車比較盛行,香港的單車徑設計本身已經是笑話,對使用者而言是極度不便。以為滾軸溜冰與單車相似,應該要在單車徑才能使用吧?原來滾軸溜冰與跑步一樣,是不能在單車徑上進行的,蔡家齊說:「踩roller係唔可以落單車徑,喺單車徑,跑步、放狗等都係犯法嘅,但係呢啲活動喺行人路就可以。我哋著上roller鞋之後,法律上嘅定義仍然係『行人』,咁我哋喺行人路上面,只要唔做出傷害你人嘅行為,就冇問題嘅,當然都唔好傷害自己啦,要控制得到先好去做。」現擁有一間滾軸溜冰學校的蔡家齊指,學校有部份同事平時也是踩roller上班。

再後退一步,蔡家齊除了希望更多人掌握到滾軸溜冰的技巧,可以代步之餘,其實有一個更簡單的期望,就是大眾知道滾軸溜冰是什麼一回事,「滾軸溜冰係冇冰嘅,原來好多人都唔知。大佬,即係菠蘿包都係冇菠蘿㗎!」但他認為不能責怪大眾,因為滾軸溜冰在香港的發展,曾經停頓了一段長時間。蔡家齊指,滾軸溜冰在香港一直有比賽,但香港人的參與程度不高,因為受制於裝備而影響普及度,「始終都係要對鞋,以同樣係滾軸運動嘅滑板為例,我玩完一陣,畀塊板下一個就可以輪流去玩,但滾軸溜冰就有啲困難。」

蔡家齊指原來好多人都唔知,滾軸溜冰係冇冰嘅。

滾軸溜冰也可細分為幾種,有速度、花式和自由式等。蔡家齊的主項是自由式,現在是香港自由式輪滑集訓隊總教練,帶領香港代表隊接近10年,但近年受疫情影響,香港隊已很長時間沒有比賽,而且自由式在香港,亦沒有如速度和花式等多人認識,蔡家齊說:「自由式港隊約有30人,其實係香港滾軸溜冰嘅最強項目,我以前覺得,比賽贏就夠,但我哋又未發展到贏就會令人記得嘅程度。」因此,曾領港隊贏過全國冠軍的他,希望透過更多宣傳,令香港人認識自由式滾軸溜冰。

蔡家齊做教練但未做過運動員留憾

蔡家齊指,自由式在香港的發展潛力其實很大,因為場地限制最少,「自由式有幾個指定項目,花式繞樁、速度過樁和花式煞停,只要有一塊平地,加幾個雪糕筒就可以比賽。」香港更曾在2018年舉辦過亞洲盃,在柴灣體育館進行,蔡家齊續說:「香港如果要做速度賽,其實冇乜可能,因為冇場地,但係我哋自由式只需要好細空間就做到。」

蔡家齊指自由式的場地限制最少,因此在香港的發展潛力其實很大。

說起比賽,蔡家齊有一個遺憾,就是他從來沒有參加過任何比賽,連一場本地賽也沒有試過,「我開始從事呢個運動行業時已經係一個教練,我可以叫做係飛仔出身,唔係學院派。我成日同運動員講,你哋好幸福,有運動員光環,第時可以同人講自己曾經係香港運動員。就算我最後成就有幾高,未做過運動員呢個遺憾都係彌補唔到。」

疫情前,香港隊每年都會出外比賽,運動員都是兼職的,但幸好仍有一定的資助,蔡家齊說:「我哋都係體院B級精英項目,雖然唔喺體院受訓,但都有資助,好似2018年去巴塞隆拿比賽為例,一個運動員成本2萬幾,政府都畀咗99%。」但始終訓練場地仍然是最重要,雖然自由式對場地的要求較低,但蔡家齊為了運動有更好的發展,決定把學校搬到九龍灣一大型商場內,今年1月1日正式營業,只是在訪問後數天,1月7日就被政府勒令停業至今,一直在白白交租。這間學校是全東南亞最大的室內滾軸溜冰場,但在香港政府的防疫措施下,就算是全宇宙最先進的體育場所,這一刻都與一塊爛地無異。

蔡家齊更希望基層年青人可從運動中找到希望

蔡家齊無奈,但沒有很多負面情緒,仍想盡辦法發展滾軸溜冰,更希望基層的年青人,可從運動中找到希望,他說:「時代唔同咗,有時去學校推廣時,發現啲學生可能對全世界都失去興趣,嚴重到連打機都唔想。點解?原來阿B仔屋企有錢,可以課金買支槍,你次次都輸畀佢,點會想同佢玩。」

他認為,現時香港體壇,也是來自中產的較易取得成功,「我成立咗間NGO,希望落到基層。依家攞到獎嘅運動員,都係來自中產,香港以後選材係咪只有中產?你見內地唔係,窮鄉僻壤都出到金牌運動員,佢哋都可以好有潛力。我希望搵到佢哋,培養佢哋做到運動員,代表香港出賽,或者好似我咁,已經錯過咗嘅,仍然以運動搵到食。」其實體育只要發展得宜,本身就是一個能賺錢的產業。

蔡家齊不論出身希望能發掘到有潛力的運動員。

推廣運動,蔡家齊認為一些「傳統口號」沒有意思,最重要是令年青人看到希望,「你唔好淨係同佢講做運動強身健體,晒氣,邊個後生嘅身體唔好?但我哋同唔到佢講做運動有咩希望嘅話,就推廣唔到,你睇吓疫情來到時,第一時間係封啲咩?我希望滾軸溜冰可以為社會帶來少少改變,亦可以令滾軸溜冰提升到少少社會地位。」

記者:Kaman

閱讀更多:

競技啦啦隊大鬥法 點止係表演 翻騰後接穩 考驗團隊默契

泳將史卓妍情傾棍網球 積極推廣盼殺入洛杉磯奧運